Ritorno tanti ani indrio , quando mi zera ceo ancoi, del me nono quando copea porsei e mi savea che saria un giorno de far festa. Quatro e mesa dela matina piu o meno, buio ancoi, si sentiva el nono Gioanin che caminava fuora ntela strada che portea intro una càmera e gavea una tola granda, vècia come lu.

Dopo caminar su tante boasse, passea davanti la caponera entel porcile ( chiqueiro ) zera li el porsel, sgionfo che non caminea pi e un po vicino a casa, una pignata granda piena d`àqua che boiea.

Quando el sol scominsea a far ciaro, si sentia un strondo forte, zera el nono che spacheva la testa del pòvero animale e dopo fea un buso al meso cuore e lo catea tuto quel sàngue con una scudela. Lu ciamea la nona, “ vècia, vècia “ porta l`àqua calda, fate furba e cosi scominsea quel laoro; dopo del curor pulito , taiarlo e far tute le robe bone par magnar.  Meno de una ora, el porsel zera picado in su, già con le budele tuto fuora e mi che aspetea la vesciga ( bechiga ), calda ancoi e con la boca sufiava fin che la sgionfea e con un spago strucava forte. Cosi, mi, me fradel e me cusin scominsàvino a giugar.

Gambe, testa, schena, pansa, già era tuto su la tole, parché le ore de far musete/cudighin, salame, figadel, scòrfici, sisole,sacol, panseta, mursiglia, bagna; ma non dimenticare le budele,parché al fin del laoro se fea anca el saon. Pronto, cosi riva la note. Picado su el sufito, pi de diese stanghe de salame che tuti giorno el nono contea par vede si mancava qualcun.

Che vóia de catar fuora una gamba, mà che paura del nono, parché non ze come adesso che si magna tuto quel che se vol, nò nò, quela olta se magnea sol una o due fete quando zera mezdi o note, prima di dormire.Ma cosi zera la vita dei coloni, lori savea quanti laori se fea perun fiorin.

E mi ? E mi con el pensiero de quela olta, tanti ani fà, ricordo quando el nono Gioanin, copea porsei.